بافڵ جەلال تاڵەبانی سەرۆکی یەکێتیی نیشتمانیی کوردستان لە ساڵیادی شەھیدبوونی، لیوا شێرکۆ فاتیح شوانی و لیوا حوسێن مەنسوور پەیامێکی بڵاوکردەوە و رایگەیاند؛ ئەو دوو فەرماندەیە بەگیان و خوێنی خۆیان ئێمەو کەرکوک قودسی کوردستانیان لە تیرۆریستانی داعش پاراست.
دەقی پەیامی بافڵ جەلال تاڵەبانی سەرۆکی یەکێتی نیشتمانی کوردستان:
لەیادی دە ساڵەی شەھیدبوونی ھەردوو فەرماندەی قارەمان و دیاری گەلەکەمان، لیوا شێرکۆ فاتیح شوانی، لیوا حوسێن مەنسوور و ھاوڕێکانیان، سەری رێزو نەوازش دادەنەوێنین و یادو یادەوەرییان بۆ ھەمیشە بەرزڕادەگرین.
شەھید شێرکۆ فاتیح شوانی و شەھید حوسێن مەنسوور دوو تێکۆشەری بەوەفای کوردو یەکێتی کە نموونەو سونبولی ئازایەتین کە ئامادەنەبوون سەنگەری بەرگری چۆڵبکەن و ھەڵبێن، بەگیان و خوێنی خۆیان ئێمەو کەرکوک قودسی کوردستانیان لە تیرۆریستانی داعش پاراست.
ئەوان دوو شەھیدی نەمری خەباتی کوردایەتین، رەمزی کوڕانی یەکێتین کە قەت سەنگەریان چۆڵ نەکردووە لەپێناو شکۆی گەلەکەیان.
یەکێتی و ھەڤاڵەکانتان بۆ ھەمیشە بەڕێزو شکۆوە یادتان دەکەینەوە و ھەرگیز لەیادتان ناکەین و درێژەپێدەری رێبازی پیرۆزتان دەبین بۆ پاراستنی گەلەکەمان.
سەربەرزی بۆ کەسوکارتان و درودو سڵاو بۆ گیانی پیرۆزی شەھیدان کاک شێرکۆ فاتیح شوانی و کاک حوسێن مەنسوور و ھاوڕێکانیان و سەرجەم شەھیدانی گەلی کوردستان.
بافڵ جەلال تاڵەبانی
سەرۆکی یەکێتیی نیشتمانیی کوردستان
|